Чому дружки не співают

Чому дружки не співают?
Бо зарідки зуби мают.
Треба тіста замісити,
Дружкам зуби заліпити.

Пришли нам ту приданяне,
Што ми їм ту їсти даме?
Навариме дрібних трісок,
Накладеме на сім мисок.

Повідала рибка рибці,
Же палюнка єст в барилці.
А ми отсаль не підеме,
Докля ми єй не вип'єме.

Милий-милий, буд же мі здрав,
Добру ти мя фраїрку мав,
Добру-добру не хоц яку,
Не будеш мав нигда таку.

Боже-Боже, нич не зроблю
Лем я продам свою ролю,
Ролю продам за дукати
Сам ся піду звербувати.

Кермеш-кермеш, Бог тя створив,
Давно я ся на тя строїв,
Забив бичка и теличку
Кермеш випав у п'ятничку.

Поділитись сторінкою: